Illum kellha tispiċċa d-dinja...

Għadna hawn - minkejja xhur sħaħ nisimgħu li ġejja l-aħħar tad-dinja, il-21 ta' Diċembru kienet ġurnata normali. La d-dinja u lanqas iċ-ċivilizzazzjoni umana ma spiċċaw.

Ix-xniegħa, jew aħjar il-profezija, li l-Ġimgħa kellha tkun l-aħħar tad-dinja, ġiet interpretata mill-kalendarju antik tal-kultura Maya fl-Amerika t'Isfel. Dan il-kalendarju kumplikat hu bbażat fuq sistema ta' ċikli twal. Jispiċċa ċiklu u jibda ieħor u kien infatti hawn li sar l-iżball - il-21 ta' Diċembru 2012 hija l-ġurnata fejn jispiċċa wieħed minn dawn iċ-ċikli u jibda li jmiss.

Iżda ħafna madwar id-dinja ħadu din il-profezija b'serjeta' kbira. Fiċ-Ċina l-Pulizija arrestat mijiet ta' membri ta' kult li jemmnu fl-aħħar tad-dinja u eluf madwar id-dinja ppreparaw għal din l-eventwalita' u remaw il-kantini b'ikel u provvisti bħal li kieku jekk tispiċċa d-dinja dan se jagħmillhom xi ġid.

Żgur li minn dan kollu sejrin tajjeb dawk li remaw bl-ikel ħdejn it-tempji tal-Maya f'pajjiżi bħall-Messiku, il-Honduras u l-Peru, postijiet li f'dawn is-siegħat qed iżuruhom eluf ta' turisti.

Jidher li għalissa l-aħħar tad-dinja se nibqgħu narawha biss fil-films. Għalkemm il-ġurnata tispiċċa f'nofs il-lejl - min jaf, sa dak il-ħin kollox jista' jiġri.