Screen and Stage Classics fil-festa ta’ San Ġwann Bosco

"Screen and Stage Classics" se jkun il-kunċert annwali tal-il-‘Gozo Youth Wind Band’ fi ħdan il-‘Gozo Youth Wind Band & Orchestra’. Bħalissa qed isiru l-aħħar thejjijiet tal-kunċert li se jsir fi tmiem il-festa ta’ San Ġwann Bosco li ssir fil-Victoria l-Ħadd 27 ta’ Jannar fis-7.30pm fuq il-palk tat-teatru tal-Oratorju Don Bosco. Il-programm ta’ dis-sena se  jinkludi fost l-oħrajn xogħlijiet bħal March of the Olympians, siltiet mill-Musicals Wicked u Chitty Chitty Bang Bang, l-Egmont Overture ta’ Beethoven, Gone with the Wind, temi minn Night on the Bald Mountian, kif ukoll silta interessanti mill-Mikado. Bla dubju l-Gozo Youth Wind Band dejjem taħt id-direzzjoni u Fundatur tagħha Mro Joseph Grech għal darba oħra qed tagħmel l-almu kollu tagħha biex waqt li tintroduċi arranġamenti ġodda fix-xena lokali mużikali, tiddeverti lil dawk kollha li jmorru jisimgħuha.

Bħal Youth Orchestra, anke l-Gozo Youth Wind Band tikkonsisti f’madwar ħamsin element mużikali żagħżugħ li lkoll tgħallmu l-mużika; dawn imbagħad jiltaqgħu b’mod regulari biex iħejju għall-għadd ta’ kunċerti li huma jagħtu matul is-sena. Il-kumpless kollu issa ilu ħdax-il sena li twaqqaf.  Ta’ min ifakkar li l-‘Gozo Youth Orchestra’ iktar tard din is-sena, flimkien ma’ Mużiċisti żgħażagħ minn orkestra Ġermaniża, se jerġgħu jippreżentaw fil-bitħa tal-Ministeru għal Għawdex l-ispettaklu mużikali Opera vs Pop Under the Stars it-Tnejn 29 ta’ Lulju 2013 fis-7.30pm.