28 ta' Diċembru, 2012
15:46 CET |
Fis-sit elettroniku tiegħu, l-Bank Ċentrali ta' Malta ppubblika l-aġġornament tar-rapport dwar l-istabilità finanzjarja li jkopri żviluppi li seħħew fl-ewwel 6 xhur tal-2012.
L-aġġornament josserva li minkejja li l-kundizzjonijiet makro-finanzjarji barra l-pajjiż baqgħu ta' sfida, l-ekonomija lokali baqgħet b'saħħitha u b'hekk kompliet issostni l-istabilità finanzjarja. L-analiżi fl-aġġornament turi li f'dawn l-aħħar xhur ma' tfaċċawx riskji u perikli ġodda għas-sistema finanzjarja f'Malta. Għaldaqstant il-prospetti ta' riskju msemmija fir-rapport dwar l-istabilità finanzjarja 2011 għadhom validi. Fl-isfond ta' inċertezza fis-swieq internazzjonali u fl-attività ekonomika globali dan l-aġġornament ikompli jsostni l-importanza li tinżamm l-ogħla livell ta' prudenza.
Ir-rapport tal-Bank Ċentrali jgħid li fl-ewwel 6 xhur ta' din is-sena, il-Core Domestic Banks komplew jespandu l-iktar minħabba li żdied is-self lill-individwi. Is-self lil klijenti tal-banek kompla jkun iffinanzjat kollu kemm hu minn depożiti tal-klijenti u b'hekk l-aċċess għall-iffinanzjar inżamm b'saħħtu. Sadattant, il-banek komplew iżidu livelli għoljin ta' likwidità. Il-profitti tagħhom sa nofs is-sena wkoll kienu ogħla minn ta' sena qabel minħabba dħul nett akbar mill-imgħax.
Dan ikkontribwixxa biex jinżammu proporzjonijiet ta' solvibilità ferm ogħla minn dawk mitluba mil-liġi. Ir-rapport isemmi wkoll ir-riskji mill-komponenti l-oħra tas-settur finanzjarju, jiġifieri banek internazzjonali, kumpaniji tal-assigurazzjoni u fondi ta' investiment baqgħu baxxi, sostnumti mill-prestazzjoni ġeneralment pożittivi ta' dawn l-istituzzjonijiet matul l-ewwel sitt xhur tas-sena 2012. Tisemma' wkoll il-kwalità tas-self għal xiri ta' djar li baqgħet stabbli filwaqt li l-banek irrappurtaw livelli ogħla ta' provvedimenti għal telf li jista' jkollhom fuq is-self kif ukoll ta' kapital addizzjonali sabiex jilqa' għal kwalunkwe riskju.
Wieħed jista' jsib l-aġġornament tar-rapport dwar l-istabilità finanzjarja fuq is-sit elettroniku tal-Bank Ċentrali ta' Malta- www.centralbankmalta.org
|
sezzjoni: Ekonomija
Ċentri tas-saħħa
