10 ta' Jannar, 2013
15:05 CET |
Il-Malta Labour Party m'għandux pjan alternattiv, Plan B. Jekk ma jsibx investituri privati li minn buthom ikunu lesti li jinvestu aktar minn €300 miljun, il-wegħda tal-Mexxej Laburista li jorħsu l-kontijiet ittir mar-riħ.
Dan joħroġ ċar minn dak li qal Muscat stess waqt attività politika li saret fil-Fgura li matulha reġa' pprova jfiehem il-prosposta li għandu hu biex iraħħas il-kontijiet, liema proposta tfisser li pajjiżna jiġi dipendenti mill-privat għall-enerġija.
Filwaqt li qal li huwa kunfidenti li jkun hemm xi ħadd mis-settur privat li jinvesti aktar minn €300 miljun, Muscat tenna wkoll li m'għandu xejn f'idejh u ma laħaq ftehim ma ħadd biex tinbena powerstation ġdida, kif irid hu.
Mill-preżentazzjoni li saret mill-konsulenti DNV Kema, li qabbad il-MLP stess, jirriżulta li bil-konverżjoni tal-estensjoni tal-BWSC f'Delimara għall-gass u l-bini tal-pipeline tal-gass minn Malta għal Sqallija, bl-għajnuna tal-fondi Ewropej, kemm il-kontijiet kif ukoll il-provvista tal-gass jiġu irħas mill-bini ta' powerstation ġdida kif qed jipproponi Muscat.
Mistoqsi mill-ġdid meta se jippubblika r-rapporti tekniċi u fid-dettall dwar din il-proposta, anke Muscat, bħal esponenti oħra Laburisti qablu, ħarab milli jwieġeb.
Waqt il-konferenza tal-MLP, fejn tħabbret din il-prosposta, il-ġurnalisti ġew imwegħda mid-Deputy Leader tal-MLP Louis Grech li se jingħataw kopja ta' dawn ir-rapporti iżda s'issa ġiet ippubblikata biss il-preżentazzjoni li saret dakinhar.
Din tinsab fuq is-sit elettroniku ta' Muscat u mhux fuq il-website uffiċjali tal-MLP.
|
sezzjoni: aħbarijiet lokali
Ċentri tas-saħħa
