Is-sessjonijiet plenarji fi Strasburgu se jkomplu jsiru

Id-deċiżjoni tal-Qorti Ewropea tal-Ġustiżżja (ECJ) hi li jkomplu jsiru s-sessjonijiet plenarji fi Strasburgu. Dan wara li numru ta' MEPs, il-maġġoranza Ingliżi, talbu biex il-prattika ta' kull xahar titwaqqaf.

L-awtoritajiet Franċiżi ressqu l-Parlament Ewropew il-qorti wara li għadda vot favur it-tneħħija ta' sessjoni fis-sena minn Strasburgu din is-sena u s-sena d-dieħla. Il-verdett tal-qorti kien favur Franza hekk kif saħqet li skont klawżola fit-trattat dwar il-funzjonament tal-Unjoni Ewropea, iridu jsiru 12-il sessjoni plenarja sħaħ f'sena kalendarja. Il-qorti kompliet tgħid li minkejja n-nefqa, minkejja li l-istess xogħol qed isir f'żewġ postijiet, id-deċiżjoni dwar it-tneħħija tas-sessjonijiet fi Strasburgu trid tiġi mill-Istati Membri u mhux mill-Parlament jew il-qorti.