Ikompli s-Summit tal-UE fi Brussell

Illum qed ikompli s-summit tal-mexxeja tas-27 pajjiż membru tal-UE li qed jiddiskutu t-triq 'il quddiem għall-Unjoni Ekonomika u Moneterja – jiġifieri l-politika ekonomika tal-UE.

Fl-ewwel sessjoni l-bieraħ filgħaxija il-mexxeja, fosthom il-Prim Ministru Malti Lawrence Gonzi, komplew bid-diskussjoni dwar il-mekkaniżmu ta' superviżjoni tal-banek, li għandu jsaħħaħ is-sistema finanzjarja fl-UE u jeqred iċ-ċirku vizzjuż bejn il-banek u l-istati. Dan billi l-akbar banek, li jekk jikkollassaw jistgħu jaffetwaw l-ekonomiki tal-UE, jaqgħu taħt is-superviżjoni tal-Bank Ċentrali Ewropew.

Huma qablu li sal-ewwel xitt xhur tas-sena d-dieħla għandu jitwaqqa qafas regolatorju għal din is-sistema, biex meta tiġi mwaqqfa fl-2014 ikollha l-kapaċita' li tiffinanzja hi stess il-banek li jistgħu jispiċċaw f'diffikulta'. Qablu wkoll li apparti s-Single Supervisory Mechanism hemm bżonn li jitwaqqaf ukoll il-Mekkaniżmu ta' Riżoluzzjoni, li jipprovdi l-għodda kollha għall-banek li jkunu f'diffikulta'. Dan għandu jipprovdi sistema iktar sigura u effettiva biex fl-eventwalita' li xi bank jispiċċa f'diffikulta' jitnaqqas ir-riskju għall-ekonomiji u għat-tax payers.

Id-diskussjonijiet iffukaw ukoll fuq it-titjib fil-framework ekonomiku tal-UE bil-President tal-Kunsill Ewropew Hermann van Rompuy mistenni jressaq numru ta' proposti fil-Kunsill Ewropew ta' Ġunju 2013 biex l-integrazzjoni ekonomika fl-UE tkompli timxi 'l quddiem.

Fi stqarrija maħruġa fl-aħħar siegħat Herman Van Rompuy qal li minkejja li l-agħar parti tal-kriżi taż-żona ewro għaddiet għad fadal x'isir, iżda issa qed naraw ir-riżultati tal-ħidma iebsa tal-aħħar xhur. Tkellem  ukoll dwar il-Greċja, wara l-qbil li tiġi rilaxxata parti oħra mill-bailout għal dan il-pajjiż, u sostna li dan huwa eżempju tas-solidarjeta' tal-UE lejn il-pajjiżi membri.