maltarightnow.com
11 ta' Jannar, 2009
18:46 CET |
L-ekonomija Maltija mxiet b'ritmu tajjeb, b'mod partikolari fl-ewwel 9 xhur tas-sena li għadha kemm ġiet fi tmiemha. Statistika li għandu f'idejh maltarightnow.com turi li f'dan il-perjodu l-kumpaniji l-ġodda żdiedu b'aktar minn elfejn.
Dawn iċ-ċifri juru żieda ta' 109 kumpaniji jew 5.6% fuq l-istess disa' xhur tal-2007. Statistika li qed tiġi interpretata bħala sinjal ta' fiduċja fl-ekonomija Maltija u dan għax turi li s-settur privat għal darb'oħra baqa' jinvesti fil-pajjiż. Ħarsa dettaljata lejn iċ-ċifri li kiseb maltarightnow.com turi li l-iktar tliet xhur li fihom ġew reġistrati kumpaniji mal-Awtorita' Maltija għas-Servizzi Finanzjarji, kienu dawk tat-tieni kwart tas-sena. Bejn April u Ġunju n-numru ta' kumpaniji f'Malta żdiedu b'723. Minnha nnifsiha żieda marġinali peress li fl-istess tliet xhur tas-sena ta' qabel ukoll kienu ġew reġistrati 705 kumpanija ġdida. Meta wieħed iqabbel l-istatistika għall-2008 ma' dik tas-sena ta' qabel, l-ikbar żieda kienet reġistrata fl-ewwel tliet xhur. Bejn Jannar u Marzu tas-sena li għaddiet ġew reġistrati kważi 700 kumpanija oħra, żieda ta' mija tnejn u sittin kumpanija ġdida jew 31 fil-mija meta mqabbel mal-istess tliet xhur tas-sena ta' qabel. Minkejja li din id-darba, fl-istess żmien kien hemm l-elezzjoni ġenerali.
Bejn Lulju u Settembru li għaddew ġew reġistrati total ta' 644 kumpanija ġdida. Għalkemm iċ-ċifra totali għal dawn it-tliet xhur tibqa' waħda sostanzjali, din turi tnaqqis ta' 71 kumpanija jew tletin fil-mija fuq l-istess perjodu tas-sena ta' qabel. Tnaqqis li jista' jkun marbut mal-ewwel effetti tal-kriżi finanzjarja u ekonomika internazzjonali li bdiet thalli l-ewwel vittmi tagħha fis-suq tan-negozju minn Awwissu li għadda 'l quddiem.
|
