13 ta' Jannar, 2013
19:16 CET |
Il-komunità indiġena li qed toqgħod viċin l-istadium ikoniku fil-Brażil – il-Maracana Stadium f'Rio de Janeiro – ħarġu jipprotestaw kontra t-tneħħija antiċipata tagħhom.
Viċin dan l-istadium hemm dak li kien il-Mużew Indiġenu, l-ewwel wieħed tax-xorta tiegħu fl-Amerika ta' Isfel. Meta l-mużew għalaq, il-bini sar id-dar permaenti ta' ħafna familji indiġeni.
Bħalissa, il-Maracana għaddej minn rinnovazzjoni kbira biex fis-sajf jilqa' fih it-Tazza tal-Konfederazzjonijiet, it-Tazza tad-Dinja tal-2014 u l-Olimpjadi tal-2016.
L-awtoritajiet qed jgħidu li l-mużew indiġenu viċin l-istadium hu ta' periklu għall-mobbiltà urbana fl-inħawi, u minfloku l-uffiċjali jridu jibnu parkeġġ għal 10,000 karozza.
Imma l-komunità indiġena lesta biex tiġġieled.
“Il-perusni indiġeni qed jiġu mhedda. Hawnhekk mhux il-kultura tagħna biss hi f'riskju, imma anki l-proprjetà tagħna li nbniet mill-antenati tagħna u għadha hemm sal-lum,” qal wieħed minn dawk li pprotestaw.
Il-kap inġinier tal-proġett tal-Maracana Stadium, Icaro Moreno, ippprova jitkellem mal-kap tal-komunità indiġena, imma t-tensjoni kienet kbira u kellu jiġi eskortat mill-Pulizija.
Preżenti wkoll fuq il-post il-prosekutur Federali, Daniel Macedo, li wissa lill-Pulizija li għalkemm ma nqalgħux inċidenti, jekk kienu se jippruvaw jinvadu l-bini, kienu se jkunu qed jiksru l-liġi u jistgħu jiġu akkużati b'abbuż ta' poter.
Ix-xogħol ta' rinnovazzjoni fil-Maracana Stadium suppost li kellu jkun lest sa Frar, u l-FIFA diġà ddikjaratu bħala l-aktar stadium li jinsab lura fix-xogħol.
|
sezzjoni: sport
Ċentri tas-saħħa
