Il-problema tal-Mercedes kienu l-fondi

L-eks champion tad-dinja Michael Schumacher qal li ma kellux avventura pożittiva mal-Mercedes minħabba li t-tim kien nieqes mill-flus. Schumacher kien irtira mill-isport imma irritorna biex ingħaqad mal-Mercedes u għamel tliet snin fejn qatt ma rebaħ Grand Prix. 

 

Kienu ħafna li stennew aktar minn dan is-sewwieq li b’kollox rebaħ seba’ titli mondjali. Mhuwiex sigriet il-fatt li l-Mercedes ma jonfqux daqs manifatturi kbar bħalma huma l-Ferrari u r-Red Bull u fil-fatt Schumacher qal li din kienet il-problema ewlenija. 

“F’dawn l-aħħar snin ir-Red Bull, bil-flus li kellhom għad-dispożizzjoni tagħhom setgħu jibnu tim li llum m’hawnx aħjar minnu. Meta kont mal-Ferrari l-istess ħaġa. Dawn kellhom flus kbar. Mal-Mercedes storja oħra. Mal-Mercedes trid taħdem b’li jtuk,” spjega s-sewwieq Ġermaniż. 

 

Minn meta Brawn xtara lil Mercedes fl-2010 l-ebda sewwieq ta’ dan it-tim ma spiċċa mal-ewwel erbgħa. Schumacher irtira fl-aħħar tal-istaġun u minfloku l-Mercedes akkwistaw lil Lewis Hamilton, eks sewwieq tal-McLaren.  Flimkien ma’ Hamilton se jkun hemm qed isuq Nico Rosberg. Kienu ħafna dawk li ma fehmux l-għażla ta’ Hamilton, sewwieq li dejjem ipprova jkun fost l-isfidanti għat-titlu. 

Fabbrika ġdida

Il-Ferrari bdew jaħdmu fuq il-bini ta’ fabbrika ġdida fil-kwartieri ta’ Maranello fl-Italja li se tkun id-dar tat-tim tagħhom fil-Formula 1. “L-ewwel tħaffir beda biex isir il-pedament ta’ dik li se tkun id-dar tal-uffiċini tal-managers, l-inġiniera u l-istaff amministrattiv flimkien mal-ħaddiema tat-tim tagħna,” qalu l-Ferrari fuq il-websajt.

 

It-tim qal li l-post fejn se jinbnew dawn il-kwartieri kienu diġà propjetà tal-Ferrari u kien jintuża bħala parkeġġ. Dan jinsab fil-post bejn il-famuż ristorant Cavallino u l-bini eżistenti tat-tim li jmur lura sa żmien il-mibki fundatur Enzo Ferrari. Il-Ferrari, l-uniku tim li ħa sehem f’kull kampjonat tal-Formula 1 sa mill-1950, bħalissa hu l-uniku tim li jibni l-karozzi tal-F1 u l-makni fl-istess post.

Ħdejn dan il-bini hemm ukoll il-fabbrika li tipproduċi l-karozzi sportivi tat-triq.