2 ta' Settembru, 2012
18:43 CET |
L-Awstraljana ta' dixxendenza Maltija Joann Formosa kellha wirja eċċellenti waqt id-dixxiplina tal-ekwstriju individwali fil-logħob paralimpiku ta' Londra u rebħet il-midalja tad-deheb.
Formosa li għandha 51 sena u tgħix f'Melbourne kellha l-aħjar prestazzjoni fil-karriera tagħha meta kisbet punteġġ ta' 71.955 biex marret fit-tielet post wara l-Brittaniku Lee Pearson u l-Awstrijak Pepo Puch fil-bidu tal-kompetizzjoni fil-kategorija Grade 1b. Hi iżda kienet determinata li tirritorna lura b'midalja tad-deheb kif fil-fatt għamlet.
“Naf dak li rrid u ninsab għatxana għalih. Kienet il-mira ta' ħajti u tista' biss tmur aħjar minn ġurnata għal oħra. Għalhekk żommu għajnejkom fuqi. Ninsab kuntenta li ġibt aktar minn 70 u kważi lanqas irrid nemmen. Hi bħal ħolma li għadni ma qomtx minnha,” qalet Formosa wara l-ewwel wirja tagħha.
Formosa kellha moral ferm għoli wara l-ewwel jum ta' kompetizzjoni u qalet li lesta biex tisfida l-aqwa atleta Britanniku, Lee Pearson li kien ilu jiddomina dan l-event 1b sa mis-sena 2000 fejn rebaħ disa' midalji paralimpiċi.
“Dejjem żammejt mal-miri tiegħi. Naf fejn irrid immur u naf x'irrid. Żammejt biss ma' dak li nemmen u issa kont kapaċi nirrealizzah,” qalet Formosa li qed tikkompeti biż-żiemel tagħha Worldwide PB.
Joann Formosa kienet weġġgħet b'inċident taż-żiemel u baqgħet mingħajr l-użu sħiħ ta' saqajja.
F'Malta Formosa għandha jgħixu bosta qraba fosthom zijiet u kuġini u l-ġunral il-mument tal-ħarġa tad-19 ta' Awwissu kien ippubblika artiklu sħiħ dwar din l-atleta ta' dixxendenza Maltija li stqarret li tixtieq li tiġi żżur il-qraba tagħha f'Malta u forsi issa se tkun tista' tagħmel dan bħala Champion tal-logħob paralimpiku.
Missier Joann kien emigra lejn l-Awstralja meta kien għadu ġuvni u żżewweġ hemm fejn kellu erbat ibniet u tifel. F'Malta missieru kellu wkoll razzett tal-baqar f'Tal-Balal.
|
sezzjoni: sport
Ċentri tas-saħħa
