Mario FRENDO
26 ta' Diċembru, 2012
11:46 CET |
Is-26 ta' Diċembru hija l-ġurnata magħrufa bħala 'boxing day', u din hija waħda minn dawk il-festi li ftit hawn għarfien dwar kif bdiet u x'jiġi ċċelebrat f'din il-gurnata. Li żgur kulhadd jaf huwa li boxing day tiġi eżattament l-għada tal-Milied.
Jidher li din il-festa oriġinat fl-Ingilterra fil-Medju Evu, u l-kelma 'boxing' ġejja minn 'kaxxi tal-Milied', li dak iż-żmien kienet ekwivalenti għall-frażi 'rigal tal-Milied'.
L-għada tal-Milied, il-qaddejja tan-nobbli u l-familji sinjuri kien ikollhom ġurnata mal-familji tagħhom, u kienu jingħataw 'kaxxa tal-Milied' sabiex tinfetaħ mal-familji tagħhom.
Storiċi oħrajn jorbtu l-isem ta' din il-festa mat-tradizzjoni li kienet teżisti li titqiegħed kaxxa fil-knejjes f'Jum il-Milied sabiex jinġabru flus għall-fqar, liema kaxxa kienet tinfetaħ l-għada tal-Milied.
Storja oħra tgħid li fl-antik, igfna kbar kienu jkunu mgħobbija b'kaxxa ssigillata mimlija bil-flus, bl-iskop li ggib xorti tajba. Jekk il-vjaġġ kien jgħaddi b'wiċċ il-ġid, il-kaxxa kienet tingħata lill-foqra fil-Milied.
Hawn ħafna stejjer marbuta mal-oriġini ta' din il-festa, madanakollu kollha jitkellmu dwar l-għoti u l-ftuh ta' rigali, u allura wiehed jista' jgħid li boxing day hija festa marbuta ma' għotjiet ta' rigali.
Għalkemm m'hawnx qbil fuq x'kien eżattament dak li ispira l-festa tal-'boxing day', l-oriġini tal-festa m'għadhiex daqsekk relevanti, u llum il-ġurnata jsiru affarijiet oħra li m'humiex direttament marbuta ma' x'kien isir qabel f'din il-ġurnata.
Fl-Ingilterra, Wales u l-Kanada, boxing day hija festa Nazzjonali u f'ħafna pajjiżi tal-Commonwealth, il-boxing day illum il-ġurnata tfisser shopping hekk kif f'ħafna pajjiżi, inluż Malta, ħafna ħwienet jibdew bis-sale ta' Jannar.
Għal ohrajn, boxing day hija estensjoni tal-festa tal-Milied, bħallikieku l-ikliet, id-divertiment u l-ferħ li jġib miegħu jum il-Milied m'huwiex biżżejjed, u allura jkun hemm il-bżonn ta' ġurnata oħra ta' mistrieħ, ikel u xorb.
|
sezzjoni: Kurżitajiet
Ċentri tas-saħħa
