Yolande SPITERI
2 ta' Mejju, 2010
14:30 CET |
Wirja ta' inġinerija maħduma li tikkonsisti f'mudelli ta' ajruplani, vapuri, karozzi,u ferrovija qed titella' fil-kwartieri ġenerali tal-iscouts fil-Furjana.
Ix-xogħol hu maħdum mill-membri tal-Assoċjazzjoni tal-Inġiniera tal-Mudelli jinkludi wkoll tankijiet tal-gwerra, figurini, jottijiet, kapelli, torrijiet, dioramas jew aħjar xeni bbażati fuq pajsaġġ Malti li jesprimu storja jew ġrajja u kraft ieħor maħdum minn materjal varjat bħall-ħadid u l-bronż.
Din il-wirja qed issir għas-27 sena konsekuttiva u se tibqa' miftuħa sal-Ġimgħa 9 ta' Mejju kuljum bejn id-9 ta' filgħodu u t-8 ta' filgħaxija. Il-ftuħ sar il-Ġimgħa filgħaxija mill-Kap tal-Iscouts f'Malta Kenneth De Martino u d-dħul hu b'xejn.
Qed jiġi eżebit ukoll proġett li jista' jintuża bħala backdrop f'pjazza San Ġorg, u jkun addatat għad-diversi attivitajiet li jsiru hemmhekk fosthom parati ta' suldati.
Min jżur din il-wirja jista' wkoll jara l-proċess ta' kif tinbena ferrovija .Wieħed għandu l-opportunita` jara u jitkellem mad-diversi ħaddiema li qed jaħdmu l-proġetti varji hekk kif l-għan ewlieni ta' din l-esebizzjoni hu li jinħoloq ambjent li fih wieħed jaħdem f'team u jaqsam l-ideat ma' xulxin.
|
