Tnaqqis fl-Indiċi tal-Prezzijiet tal-konsumatur

L-Indiċi tal-Prezzijiet tal-konsumatur għal Novembru ra tnaqqis ta' kważi 2%.

Ċifri tal-Uffiċċju Nazzjonali tal-Istatistika juru li t-tnaqqis ta' 1.9% kien dovut l-iktar għal tnaqqis ta' 10.2% fl-indiċi tal-lukandi u r-ristoranti minħabba tnaqqis staġjonali fil-prezzijiet tal-akkomodazzjoni.

Tnaqqis fil-prezz tas-servizzi tal-internet ikkontribwixxa għal tnaqqis ta' 2.5% fl-indiċi tal-Komunikazzjoni. Roħs fil-biljetti tal-ivjaġġar bl-ajru wassal għal tnaqqis ta' 1.3% fl-indiċi tat-Trasport.

Min-naħa l-oħra, l-indiċi tas-Saħħa tela' b'0.3% minħabba żieda fil-miżati għal servizzi mediċi, segwit minn żieda ta' 0.2% fl-indiċi tal-Alkohol u t-tabakk minħabba żieda fil-prezz tal-inbid. Żieda fil-prezz tat-tessuti wasslet għal żieda marġinali ta' 0.1% fl-Indiċi tal-manutenzjoni tad-djar.

Ir-rata annwali tal-inflazzjoni x-xahar li għadda kienet 3.6% filwaqt li l-inflazzjoni medja fl-aħħar tnax-il xahar kienet fil-livell ta' 3.1%.