Sorpriż dwar il-credit cards

Is-Santa Sede insistiet li ttieħdu l-miżuri adegwati li jikkumbattu l-ħasil tal-flus, u għaldaqstant ma tifhimx għalfejn il-Bank tal-Italja imblokka l-użu tal-credit u d-debit cards fil-Belt tal-Vatikan.

Il-Bank Ċentrali kien waqqaf lid-Deutsche Bank Italy milli jipprovdi servizzi ta’ flus elettroniċi għall-Vatikan, fl-ewwel ta’ Jannar, fost allegazzjonijiet li s-Santa Sede jonqosha l-kontrolli għal kontra l-ħasil tal-flus.

Il-pass ħalla lill-eluf tat-turisti li żaru l-mużewijiet u l-gift shops tal-Vatikan ‘fuq sieq waħda’, u kellhom bilfors jużaw il-flus kontanti.

Min-naħa tiegħu, Renè Bruelhart, li jmexxi l-Awtorità għall-Informazzjoni Finanzjarja tal-Vatikan (FIA) qal waqt intervista lill-Corriere della Sera li ‘tassew hu sorpriż’ b’dak li seħħ, u insista li s-Santa Sede implimentat il-kontrolli li tesiġi dwarhom l-Unjoni Ewropea u li ‘b’hekk ma jifhimx din l-azzjoni’.

“Fir-realtà, u meta wieħed jikkunsidra n-natura partikulari tal-Istat tal-Vatikan, ġew adottati l-miżuri adegwati għall-viġilanza, il-prevenzjoni u l-azzjonijiet kontra l-ħasil tal-flus u l-iffinanzjar tat-terroriżmu”, tenna l-Kap tal-FIA.