Sentenza sospiża għal żewġ Franċiżi li wettqu ħsara meta kienu fis-sakra

Żewġ żgħażagħ Franċiżi li jaħdmu Malta ma' kumpanija tal-'e-gaming' ġew ikkundannati disa' xhur ħabs sospiżi għal sena u se jkollhom iħallsu bejniethom €1,989 wara li ikkaġunaw ħsara fuq tliet karozzi meta kienu fis-sakra.

Sylvian Preziosi u Diego Baussan, li t-tnejn għandhom 19-il sena u joqgħodu fi blokka ta' appartamenti fil-Gżira, ammettew li l-Ġimgħa, l-10 ta' Jannar, għall-ħabta tal-5.00 a.m. f'San Ġiljan, ikkaġunaw ħsara fil-vetturi ta' Christine Angela Salomone, Lewis Tabone u David Joseph Alamango.

Huma ammettew ukoll li serqu t-tabella tar-ristorant Badass li jinsab fl-istess lokalità, li kisru l-paċi pubblika b'għajjat u ġlied u li m'obdewx l-ordnijiet tal-awtoritajiet. Il-Maġistrat Antonio Micallef Trigona ordnalhom biex li fi żmien sitt xhur iħallsu s-somma ta' €1,989 lit-tliet sidien tal-karozzi. Il-prosekuzzjoni tmexxiet mill-Ispettur Daryl Borg waqt li ħadd ma deher għall-Franċiżi.