Muscat jerġa' jikkonferma l-inkompetenza tiegħu

Ilbieraħ Muscat reġa' wera li jitkellem mingħajr ma jeżamina l-affarijiet. Huwa qal li Malta m'għaddietx mill-eżami għar-rigward ta' particulate matter u Sulphur Dioxide (SO2). Qal dan il-Partit Nazzjonalista fi stqarrija.

Jidher li Muscat jitkellem bl-addoċċ u jaħseb li ħadd ma jmur jivverifika dak li jkun qal. L-aħħar rapport li għamlet Malta   (http://www.mepa.org.mt/file.aspx?f=5460 ) kien juri li l-medja annwali tal-konċentrazzjoni ta' Sulphur Dioxide (SO2) baqa' sewwa taħt il-livell kritiku tal-Unjoni Ewropea. 

  

Mill-1990 'l hawn, l-ogħla livelli ta' Sulphur Dioxide (SO2) reġistrati ġewwa Malta kien fl-1998, l-aħħar sena ta' Gvern Laburista. Minn dik is-sena, l-emissjonijiet ta' Sulphur Dioxide (SO2) fl-arja ġewwa Malta niżlu b'74%, li huwa tnaqqis aħjar minn dak fl-Unjoni Ewropea. 

  

Għar-rigward ta' particulate matter, l-istandards tal-Unjoni Ewropea inqabżu fl-2010 fl-Imsida, li kif jaf kulħadd huwa sit mimli traffiku. Id-deċiżjonijiet tal-Gvern, inkluż id-dħul ta' karozzi tal-linja ġodda, it-tiġdid tal-white taxis, coaches u mini buses, servizzi bil-lanċa ġodda, l-għeluq tal-power station tal-Marsa u l-bini tal-extension ferm aktar nadifa ta' Delimara għandhom iwasslu għal titjib kbir. 

 

Il-Partit Laburista mhux kapaċi jmexxi l-pajjiż, kif jixhdu l-iżbalji li diġa' wettaq fl-ewwel ftit jiem tal-kampanja elettorali ttemm tgħid l-istqarrija.