27 ta' Lulju, 2010
10:19 CET |
Ftit tal-ħin ilu, fiċ-Ċentru tal-Mediterran għall-Konferenzi fil-Belt Valletta, il-Ministru tal-Finanzi Tonio Fenech nieda id-dokument ta' qabel il-baġit 2011.
Il-Ministru spjega li fis-sentejn li għaddew il-Gvern poġġa l-enfasi tal-ħidma tiegħu biex jilqa' għall-isfidi tal-kriżi ekonomija u finzarjarja, billi b'mod partikolari intervjena fejn meħtieġ biex jiżgura u joħloq il-postijiet tax-xogħol. Dan sar filwaqt li kompla l-investiment fil-qasam edukattiv u dak soċjali. Huwa qal li l-pass li jmiss hu li, waqt li jkun żgurat l-irkupru ekonomiku, ma tintesiex il-ħtieġa li jissaħħaħ aktar il-qafas soċjali tal-pajjiż.
Id-Dokument jisħaq fuq il-bżonn ta' tisħiħ tal-investiment fis-saħħa u l-edukazzjoni, filwaqt li jipprovdi impenn ċar li titħares is-sistema ta' solidarjeta' tagħna li għandha timxi id f'id mat-tkabbir ekonomiku.
Il-Ministru Fenech spjega li kien kruċjali li l-pajjiż jibqa' kompetittiv fi żmien ta' riċessjoni internazzjonali.
Issa l-pajjiż irid jara kif isostni t-tkabbir fl-ekonomija filwaqt li jkompli jipprovdi l-għodod tal-edukazzjoni u t-taħriġ, għall-kisba ta' kulħadd. Dan ukoll fid-dawl tal-miri għall-Viżjoni 2015.
Il-Ministru wissa' wkoll fuq il-ħtieġa li titkompli titħares is-sostenibbilta' tal-finanzi tal-pajjiż. Huwa fakkar li, fejn pajjiżi oħrajn għollew it-taxxi bħall-income tax u l-VAT, fl-2009 Malta ilha tnaqqas ir-rata tal-income tax mill-2007.
Minn din is-sena tnaqqset ukoll l-income tax għas-self employed u n-negozji żgħar li jimpjegaw u jinvestu aktar.
Tonio Fenech sostna wkoll li Gћawdex hija gżira b'wirt u kultura uniċi, bil-vantaġġi u l-iżvantaġġi partikolari tagћha, u gћalhekk jixirqilha strateġija ekonomika differenti. Il-ħidma favur Għawdex għandha tiffoka tliet setturi partikolari, l-agro-kultura, it-turiżmu lokali u barrani kif ukoll l-ekonomija bbażata fuq l-gћarfien.
Mad-Dokument ta' Qabel il-Baġit ġew ippubblikati wkoll Rapport dwar l-Inflazzjoni kif ukoll abbozz ta' TaxPayer's Charter għall-konsultazzjoni.
Il-Ministru ħeġġeġ lill-korpi kostitwiti biex jiġbru dan id-dokument mid-Dipartiment tal-Informazzjoni, mis-sit www.finance.gov.mt u jibagħtu l-kummenti tagħhom fuq malta.budget@gov.mt jew bil-posta fuq "Ministeru tal-Finanzi, l-Ekonomija u Investiment, Triq Nofsinhar, il-Belt" jew fuq telefon 25998244.
|
