Jitneħħa mill-inħawi ta' Giglio sa Settembru

Il-vapur tal-cruises ‘Costa Concordia’, li bħall-bieraħ sena ilu, inqaleb ’il hinn mill-gżira ta’ Giglio (fl-Italja) u bir-riżultat li tilfu ħajjithom ’il fuq minn tletin persuna, għandu jitneħħa mill-inħawi fir-reġjun tat-Toskana sa Settembru ‘bħala l-massimu’.

Il-‘Costa Concordia’ ilu maqlub fuq ġenb wieħed minn dakinhar, u peress li jinsab f’ibħra ddikjarati bħala riżerva naturali marittima, kull sforz biex il-vapur jiżżarma jista’ jħalli riperkussjonijiet negattivi għall-ambjent lokali.

Għaldaqstant, hu mistenni li l-vapur jintrefa’ u jinġibed lejn art ‘aktar ’il ġewwa’ u fejn ikun żarmat – bl-analiżi li ‘jista’ jkun impossibbli’ li l-‘Concordia’ jitneħħa mill-inħawi preżenti sa Ġunju (l-eqqel tal-istaġun turistiku).

Ir-residenti tal-lokalità huma ddisprati biex il-vapur jitneħħa peress li jiddependu kważi għal kollox mit-turiżmu. Minkejja li l-vapur maqlub fih innifsu hu ‘element kurjuż’ li jattira lill-barranin (turisti), hu mifhum li dawn iqattgħu l-anqas żmien possibbli fl-inħawi u ma jonfqu ‘kważi xejn’.

Ir-residenti ta’ Giglio jinsistu li t-turiżmu tradizzjonali – il-barranin iqattgħu btajjel fit-tul fl-inħawi – naqas bi kważi erbgħin fil-mija.

Dan, meta n-nies ma jridux iqattgħu l-vaganza f’inħawi li nbidlu ‘f’ċentru għal ħidma kolossali tas-salvataġġ’, bil-preżenza tal-vapur imgħarraq ftit ’il hinn mill-port ta’ kuljum tfakkar lir-residenti ta’ Giglio fid-diżastru.

Il-kaptan tal-‘Costa Concordia’, Francesco Schettino, hu akkużat li kkawża t-traġedja ta’ sena ilu u jrid iwieġeb dwar qtil involontarju u ‘aġir mhux xieraq’ għaliex qed jingħad li hu abbanduna l-vapur qabel aċċerta li l-passiġġieri kollha kienu salvi.