14 ta' Jannar, 2013
12:08 CET |
Dawk jaħdmu bi qligħ f'pajjiżna f'Awwissu li għadda żdiedu b'aktar minn elfejn, jew 1.4%, fuq l-istess xahar tas-sena ta' qabel.
Statistika tal-NSO turi li f'sena, bejn Awwissu 2011 u Awwissu 2012, dawk li għandhom impjieg full-time fil-gżejjer Maltin żdiedu għal 152,670. Dawk li qed ifittxu x-xogħol żdiedu biss bi 350 għal total ta' 6,800.
Iż-żieda fl-impjiegi kienet kollha mas-settur privat, b'dawk jaħdmu mal-privat jiżdiedu b'2,300 waqt li dawk li jaħdmu mal-Gvern naqsu bi kważi 200. Illum is-settur privat f'Malta u Għawdex jimpjega miegħu 112,000 persuna, waqt li s-settur pubbliku jħaddem kważi 41,000 persuna.
Għal darb'oħra, kif qed johroġ xahar wara l-ieħor miċ-ċifri li jippubblika l-uffiċċju nazzjonali tal-istatistika, l-akbar żieda fl-impjiegi kienet fost in-nisa, bin-nisa jaħdmu f'perjodu ta' sena żdiedu b'1,700 waqt li l-irġiel żdiedu biss bi 350.
L-istatistika turi wkoll li kien hemm żidiet fl-impjiegi part-time li f'sena żdiedu b'5% għal total ta' 56,000. Żieda ta' kwazi 3,000. Mill-istatistika tal-NSO joħroġ ukoll li kien hemm żieda anke fis-Self-Employed b'dawk jaħdmu għal rashom żdiedu b'240 għal total ta' kważi 18,000.
|
sezzjoni: aħbarijiet lokali
Ċentri tas-saħħa
