Inawgurata l-biċċerija l-ġdid ta' Għawdex

L-ikel huwa parti mportanti minn ħajjitna, mir-rutina ta' kuljum. U għalhekk huwa mportanti li dak li nieklu jkun proċessat b'mod iġeniku, bl-aqwa teknoloġija u skont standards Ewropej.

Huwa għalhekk li s-Sibt filgħaxija l-Prim Ministru Lawrence Gonzi inawgura biċċerija ġdida għal Għawdex, fil-prezenza tal-Ministru għal Għawdex Giovanna Debono. B'investiment ta' €2.2 miljun, din il-biċċerija ġdida bdiet topera matul din l-aħħar sena, wara xogħol estensiv li kien jinkludi bini ġdid, tiġdid tal-bini oriġinali u x-xiri ta' apparat ġdid skont regoli Ewropej.

Fid-diskors tiegħu, il-Prim Ministru rringrazzja lil bdiewa u r-raħħala Għawdxin għal ħila u d-dedikazzjoni tagħhom u talli f'dawn l-aħħar ħames snin investew aktar minn €12-il miljun ewro l-industrija.

Il-Gvern huwa mpenjat li jkompli jsaħħaħ is-settur agrikolu ta' pajjiżna, tant li f'dawn l-aħħar ħames snin, il-Gvern investa mal-€100 miljun f'għajnuna finanzjarja biex il-bdiewa u r-raħħala jżidu l-produzzjoni, jinvestu aktar u jtejjbu d-dħul tagħhom.

Dan jidher biċ-ċar mis-serer ġodda li ġew mibnija f'pajjiżna f'dawn l-aħħar snin, sal-irziezet b'teknoloġija moderna li għandna f'Malta u f'Għawdex, qal il-Prim Ministru.

U dan minbarra li ngħatat għajnuna lir-raħħala minħabba ż-żieda fil-prezz internazzjonali tal-gwież. Iktar minn hekk, il-bdiewa u r-raħħala full-time minn Jannar ta' sentejn ilu, bdew igawdu minn tnaqqis ta' 3% fuq ir-rata tas-sigurtà soċjali, filwaqt li minn Diċembru li għadda, permezz ta' liġi ġdida, bdew jingħataw iċ-ċans li jagħtu l-artijiet tagħhom bi qbiela lil qrabathom.

Ix-xogħol li sar fuq din il-biċċerija huwa parti mportanti mill-viżjoni eko-Għawdex, imħaddna mill-Gvern Nazzjonalista.

Permezz ta' dan il-proġett nispera li r-raħħala u l-bdiewa jgawdu minn ambjent tax-xogħol aħjar u l-konsumatur igawdi minn prodotti tal-ikel tal-aqwa kwalita', temm jgħid il-Prim Ministru.