Ikomplu jonqsu l-inċidenti fuq il-post tax-xogħol

Fl-2012, l-inċidenti fuq il-post tax-xogħol naqsu għal 1,700 għal kull 100,000 ħaddiem. Dan meta għaxar snin qabel, fl-2002, ir-rata kienet ta' 3,500 inċident għal kull 100,000 ħaddiem. 

Dan ħabbru l-Ministru tas-Saħħa, l-Anzjani u l-Kura fil-Komunità Joe Cassar waqt żjara fil-bini tal-Awtorità għas-Saħħa u s-Sigurta` fuq il-Post tax-Xogħol, l-OHSA.

Joe Cassar qal li l-imwiet fuq il-post tax-xogħol naqsu minn disa' fis-sena fl-2002 għal 4 fis-sena fl-2012. Saħaq li dan jirrifletti l-ħidma kontinwa tal-Gvern biex l-inċidenti fuq il-post tax-xogħol jonqsu. 

Joe Cassar irringrazzja lill-ħaddiema kollha tal-awtorità tal-ħidma kontinwa biex titqajjem kuxjenza favur livelli għolja ta' saħħa u sigurta` fuq il-post tax-xogħol.

Il-Ministru qal li ċertifikat ieħor ħareġ mill-Aġenzija Ewropea għas-Saħħa u s-Sigurta` fuq il-post tax-xogħol, li fil-website tagħha kitbet li Malta qed tmexxi f'dan il-qasam u li hi waħda mil-leaders fil-protezzjoni proattiva tal-ħaddiema. 

 Hu qal li llum l-Awtorità saret punt ta' referenza u għajnuna għal kull min ikollu bżonn is-servizzi tagħha. L-istess awtorità ħadmet biex tiżdied l-informazzjoni, l-edukazzjoni u t-taħriġ fis-soċjetà. Ma' dawn kien hemm sensiela ta' proġetti u ġew organnizzati wkoll diversi kampanji dwar prattiċi tajba fuq il-post tax-xogħol.