Mario FRENDO
23 ta' Diċembru, 2012
10:24 CET |
Il-Prim Ministru qassam għotjiet lil 14-il Kunsill Lokali bl-iskop li tinċentiva lill-Kunsilli Lokali sabiex jieħdu inizjattivi favur l-iżvilupp kulturali fil-lokalitajiet.
Il-lokalitajiet li qed jibbenefikaw mill-għotjiet huma: l-Belt Valletta, Ħaż-Żebbuġ, ir-Rabat, il-Furjana, Ħal Għaxaq, Ħal Lija, Marsaxlokk, il-Mellieħa, in-Nadur, in-Naxxar, Raħal Ġdid, San Ġwann, ix-Xagħra u x-Xewkija.
Fid-diskors tiegħu il-Prim Ministru qal li fl-aħħar snin żdied is-sensibilita' għal proġetti fil-lokalitajiet, specjalment dawk marbuta mal-kultura u l-potenzjal li l-lokalitajiet joħorġu l-identitajiet differenti tagħhom.
Il-Prim Ministru ddeskriva l-kultura u l-patrimonju fil-lokalitajiet differenti Maltin u Għawdxin bħal qawsalla ta' teżori li jeħtieġ li jkunu esebiti għat-tgawdija ta' kulħadd.
Indirizza wkoll is-Sindku ta' Ħal Lija Ian Castaldi Paris li min-naħa tiegħu qal li l-Kunsilli Lokali għandhom jibbenefikaw mill-iskemi tal-Gvern bil-għan li ċ-ċittadin igawdi l-frott tal-ħidma tal-Kunsilli Lokali.
Il-fondi li tqassmu huma parti minn skema tal-Gvern li tħabbret ftit ilu u li b'kollox tammonta għal madwar €300,000.
It-tqassim tal-għotjiet saret f'Ħal Lija fejn il-Prim Ministru żar presepju ħaj li qed jiġi organizzat mis-Soċjeta' Sant'Andrija. B'kollox f'dan il-presepju qed jieħdu sehem madwar ħamsin parteċipant, bl-iżgħar parteċipant għandu biss ħames snin filwaqt li l-akbar parteċipant għandu 65 sena.
Din hija s-seba' darba li qed jiġi organizzat dan il-Presepju Ħaj, u jinkludi 11-il attrazzjoni, fosthom xmara artifiċjali, mitħna, mehrież taż-żejt u fuq kollox l-attrazzjoni prinċipali li hi l-Maxtura.
|
sezzjoni: Kunsilli lokali
Ċentri tas-saħħa
