Diskussa sistema ta' superviżjoni għall-banek fi Brusselll

Il-Prim Ministru Lawrence Gonzi u mexxeja mis-26 pajjiż ieħor tal-Unjoni Ewropea qed jiltaqgħu f’Summit fi Brussell fejn fost l-oħrajn qed tiġi diskussa t-triq ‘il quddiem għall-Unjoni Ekonomika u Monetarja – jiġifieri l-politika ekonomika li tgħaqqad lill-pajjiżi membri f’ekonomija waħda.

Id-diskussjoni qed tiffoka ħafna fuq il-qbil li kien hemm fl-aħħar siegħat bejn il-Ministri tal-Finanzi tal-UE dwar sistema ta’ superviżjoni għall-banek – bil-għan li tiġi evitata ripetizzjoni tal-kollass ta’ banek kbar kif rajna fl-aħħar snin.

U qabel jintemm is-summit il-ġimgħa wara nofsinhar hu mistenni li l-mexxeja jkunu qablu dwar id-dettalji tal-entita fi ħdan il-Bank Ċentrali Ewropew li se tkun qed twettaq din is-superviżjoni. 

Il-Prim  Ministru ddiskuta dan is-suġġett anke waqt laqgħa tal-kapijiet ta’ stat tal-UE membri fil-Partit Popolari Ewropew li saret fi Brussell stess il-Ħamis wara nofsinhar. 

Sadattant, fil-laqgħa tal-Ministri tal-Finanzi dwar is-superviżjoni fuq il-banek kienet aċċettata proposta mressqa mill-Ministru Tonio Fenech li se twassal biex tliet banek biss Maltin jaqgħu taħt is-superviżjoni tal-Unjoni Ewropea. 

Biex pajjiżna, għal darb’oħra wera li minkejja ċ-ċokon tiegħu jista’ jkollu leħen qawwi fl-Ewropa. 

Il-proposta inizzjali kienet li jaqgħu taħt din is-sistema l-banek kollha li għandhom assi ta’ iktar minn 30 biljun ewro jew li inkella jkollhom assi li jammontaw għal iktar minn 20 fil-mija tal-Prodott Gross Domestiku tal-pajjiz. 

Minħabba ċ-ċirkostanzi ta’ Malta, il-Ministru Fenech ippropona li banek żgħar li għandhom assi ta’ inqas minn 5 biljun ewro jiġu eżentati minn din is-sistema u jibqgħu taħt is-sorveljanza tal-istat, permezz tal-MFSA. Il-proposta ġiet aċċettata.

F’kummenti lill-ġurnalisti fi Brussell il-Ministru Fenech qal li kien important wkoll il-fatt li l-bord tal-Bank Ċentrali Ewropew se jkollu membru wieħed minn kull stat – biex kulħadd ikollu leħen indaqs.

Intant is-summit tal-Unjoni Ewropea jkompli l-ġimgħa fejn qed jiġi diskuss ukoll rapport ippreżentat mill-President tal-Kunsill Ewropew Hermann van Rompuy, li fost l-oħrajn jipproponi t-twaqqif ta’ baġit separat għaz-zona ewro - bħala pass ieħor biex tkompli tingħeleb il-kriżi ekonomika fl-Ewropa. 

Dan huwa suġġett kemmxejn kontroversjali li hemm pajjiżi li għandhom riservi dwaru. Il-pożizzjoni ta’ Malta hi li taqbel ma’ inizzjattivi li jtejbu l-qagħda ekonomika fl-Ewrope u joħolqu x-xogħol iżda hemm xi punti li jridu jkunu ċċarati.