Attakki u tgħajjir fuq il-Ministru Tonio Fenech

Esponenti tal-Malta Labour Party u membri tal-media Laburista qed jinfexxu f'attakki u tgħajjir fuq il-Ministru Tonio Fenech - u dan għaliex qed jitlob li l-Labour jippubblika l-informazzjoni kollha li qed jgħid li għandu dwar il-power station ġdida li jrid Muscat.

F'każ minnhom, li sehh it-Tlieta filgħaxija, il-preżentatriċi tas-Super One Jackie Mercieca għajjret lill-Ministru Fenech Gestapo u KGB, u qalet ukoll li dan qed jaġixxi bħat t-tfal u li huwa arroganti.

Il-mistieden fil-programm kien l-eks editur tal-gazzetta tal-GWU l-Orizzont Frans Ghirxi, li wkoll kompla magħha.

Tonio Fenech kien anke vittimizzat mill-kandidat Laburista Konrad Mizzi. Darba waqt il-programm Bondi+ it-Tlieta filgħaxija u għal aktar minn darba fil-programm TVam l-Erbgħa filgħodu.

B'reazzjoni għal dan, il-Partit Nazzjonalista qal huwa xokkanti li għax il-Ministru Fenech qed jitlob lil-Lejber jippubblika l-istudji li suppost għandu dwar il-proposta fuq id-dawl, dan jiġi mgħajjar.

Il-PN qal li dan l-aġir tal-Malta Labour Party ifisser ħaġa waħda biss - li qed jaħbi r-rapporti u meta jintalab spjegazzjoni 'addio Malta Tagħna Lkoll' għax jinfexx jgħajjar u jattakka.

F'reazzjoni oħra għal dak li qed jgħid Muscat, il-Gvern qal li l-pozizzjoni tiegħu dejjem kienet konsistenti li jzomm it-tariffi fl-inqas livell b'mod sostenibbli. Għalhekk qed isir l-interconnector, u għalhekk il-Gvern irid li jsir il-pipeline tal-gass.

Il-pipeline jgħaqqad lil Malta mal-grid Ewropew u għalhekk jikkwalifika għall-fondi Ewropej. Muscat irid iġib il-gass bil-vapuri u jaqta' lil Malta mill-Ewropa, u dan ma jikkwalifika għall-ebda fondi. Dak li trid l-Oppożizzjoni jgħolli l-ispiża tal-elettriku, temm jgħid il-Gvern.