Jidħlu jiddeliberaw fil-ġuri dwar stupru li nstema’ bil-magħluq

Wara ħames sigħat u nofs ta’ indirizz mill-Imħallef Lawrence Quintano, il-ġurati daħlu jiddeliberaw biex jaslu għall-verdett fil-ġuri li nstema’ bil-magħluq ta' raġel akkużat bi stupru ta' tfajla ta' 13-il sena u li kkorrompa lill-istess tfajla. Huwa qed jiġi akkużat ukoll li kkorrompa wkoll żewġ tfajliet oħrajn ta’ 16-il sena. Il-verdett mistenni tard illum wara nofsinhar.

L-Imħallef Quintano beda l-indirizz tiegħu lill-ġurati l-Ġimgħa waranofsinhar u kompla s-Sibt filgħodu u kien ftit qabel is-siegħa ta’ waranofsinhar li huwa daħħalhom biex jiddiskutu l-eżitu ta’ dan il-każ.Kien il-Ġimgħa stess li kemm il-Prosekuzzjoni d-Difiża temmew it-trattazzjoni tagħhom dwar il-każ fil-jum. Ir-raġel li għandu qrib is-60 sena, qed jiġi akkużat bi tliet kapi ta’ akkuża, dik li kkorrompa tifla ta’ 13-il sena u li llum għandha 18-il sena, li kkorrompa lilha u żewġ tfajliet oħra li llum għandhom 21 sena u li bl-aġir tiegħu offenda l-mistħija tas-sess tagħhom, u li ssekwestra lit-tfajliet kontra l-volonta’ tagħhom.

Minbarra li l-provi fil-ġuri nstemgħu bil-magħluq, il-Qorti ordnat ukoll lill-mezzi tax-xandir biex la jissemmew ismijiet ta' dawk ikkonċernati u lanqas tissemma l-lokalità li ġej minnha l-akkużat u l-vittmi, u lanqas il-lokalita’ ta’ fejn seħħew l-allegati reati, li iżda wieħed jista’ jgħid li saru f’dar fin-naħa t’isfel ta’ Malta.

Ir-raġel, għandu jidher għalih l-Avukat Leslie Cuschieri, u huwa minn dejjem ċaħad l-involviment tiegħu fil-każ. Id-difiża qed tikkontendi wkoll li prova mportanti f’dan il-każ, dik ta’ test mediku fuq it-tfajla allegatament stuprata mhumiex għad-dispożizzjoni tal-Prosekuzzjoni u għalhekk fuq dan ir-reat huwa m’għandux jinstab ħati. Id-difiża qed tgħid ukoll li t-tfajliet ma kienux konsistenti fix-xhieda tagħhom. 

Kienu l-Avukati tal-Prosekuzzjoni mill-Uffiċċju tal-Avukat Ġenerali li talbu biex l-ġuri jinstema' bil-magħluq. L-Avukati Aaron Bugeja u Beryl Buttigieg kellhom din it-talba milqugħa mill-Qorti. Dawn minn naħa taghom qegħdin jikkontendu li mix-xhieda prodotta hemm provi biżżejjed biex l-akkużat jinstab ħati.  Fost ix-xhieda kien hemm l-investigaturi tal-każ, l-Ispetturi Louise Calleja u Paul Vassallo.