Mhux ħati li stupra tfajla ta’ 13-il sena

Mario Azzopardi ta’ 64 sena, imwieled iż-Żejtun u residenti l-Birgu ma nstabx ħati bi tmien voti favur u wieħed kontra li ftit aktar minn ħames snin ilu  stupra tfajla ta’ 13-il sena. Huwa iżda nstab ħati b’seba’ voti favur u tnejn kontra li kkorrompa lil din it-tfajla u żewġ tfajliet oħrajn. Azzopardi ma nstabx ħati li ssekwestra lit-tfajliet kontra l-volonta’ tagħhom.

Wara ħames sigħat u nofs ta’ deliberazzjoni l-ġurati waslu għall-verdett wara s-7.00 p.m. f’ġuri li nstema’ bil-magħluq.  Wara li ngħata l-verdett il-Qorti tagħat l-aċċess lil media biex isemmu l-isem tar-raġel li għadda ġuri, iżda baqgħet iżomm id-divjet fuq it-tfajliet biex dawn jibqgħu protetti. Is-sentenzi f’dan il-ġuri mistennija tingħata tard nhar it-Tnejn li ġej wara nofs inhar wara li jixhdu żewġ persuni mqabbda mid-difiża, Patri Mark Montebello u d-Direttur tal-Ħabs.

 

L-Imħallef Quintano beda l-indirizz tiegħu lill-ġurati l-Ġimgħa wara nofs inhar u kompla s-Sibt filgħodu u kien ftit qabel is-siegħa ta’ wara nofs inhar li huwa daħħalhom biex jiddiskutu l-eżitu ta’ dan il-każ. Waħda mit-tfajliet li qalet li kienet ġiet stuprata llum għandha 18-il sena, filwaqt li ż-żewġ tfajliet oħra llum għandhom 21 sena.  

Minbarra li l-provi fil-ġuri nstemgħu bil-magħluq, il-Qorti ordnat ukoll lill-mezzi tax-xandir biex la jissemmew ismijiet ta' dawk ikkonċernati u u lanqas il-lokalita’ ta’ fejn seħħew l-allegati reati, li iżda wieħed jista’ jgħid li saru f’dar fin-naħa t’isfel ta’ Malta. Azzopardi, li għalih  deher l-Avukat Leslie Cuschieri, minn dejjem ċaħad l-involviment tiegħu fil-każ u anke xehed fil-ġuri tiegħu. 

Id-difiża qalet li prova mportanti f’dan il-każ, dik ta’ test mediku fuq it-tfajla allegatament stuprata mhumiex għad-dispożizzjoni tal-Prosekuzzjoni u għalhekk fuq dan ir-reat huwa m’għandux jinstab ħati. Id-difiża qed tgħid ukoll li t-tfajliet ma kienux konsistenti fix-xhieda tagħhom. 

Kienu l-Avukati tal-Prosekuzzjoni mill-Uffiċċju tal-Avukat Ġenerali li talbu biex l-ġuri jinstema' bil-magħluq. L-Avukati Aaron Bugeja u Beryl Buttigieg kellhom din it-talba milqugħa mill-Qorti. Dawn minn naħa taghom qegħdin jikkontendu li mix-xhieda prodotta hemm provi biżżejjed biex l-akkużat jinstab ħati.  Fost ix-xhieda kien hemm l-investigaturi tal-każ, l-Ispetturi Louise Calleja u Paul Vassallo.