''Il-pjan Laburista dwar il-prezz tal-gass ottimist iżżejjed'' - l-AD

L-Alternattiva Demokratika hija mhassba dwar kemm il-kontijiet tad-dawl u l-ilma se jorħsu verament bir-raġunament tal-Malta Labour Party. Anke hi qed tappella lil-Lejber biex jippubblika l-istudji li qed jgħid li għandu dwar il-proposta li għamel.

Dan ħareġ f'konferenza tal-aħbarijiet indirizzata miċ-Chairperson tal-AD Michael Briguglio b'reazzjoni għall-proposti li ħabbar il-Malta Labour Party għall-qasam tal-enerġija.

F'konferenza tal-aħbarijiet Briguglio tenna li l-prezz tal-gass se jkompli jiżdied minħabba li d-domanda għall-gass dejjem qed tikber filwaqt li l-provvista dejjem qed tonqos, tant li ddeskriva l-argument li l-gass se jwassal għal kontijiet orħos wieħed kontra l-loġika ekonomika. Hu esprima x-xettiċiżmu tiegħu dwar iż-żmien qasir li Muscat qed jgħid li fih tista' tinbena l-powerstation l-ġdida u qal li anke sempliċi tender ta' kunsill lokali għall-ġbir tal-iskart jieħu ħafna żmien.

Huwa kkritika wkoll lil Konrad Mizzi, il-kandidat Laburista li qed jitkellem il-ħin kollu dwar dan il-proġett, għax dan qal li l-istudju dwar l-impatt ambjentali ta' proġett bħal dan jista' jsir fi ftit żmien. Briguglio qal li rapport bħal dan jieħu ħafna żmien biex jeżamina mhux biss l-emissjonijiet tal-powerstation, iżda wkoll kull impatt ieħor ambjentali. Hawnhekk, Briguglio tenna li minkejja li l-pjan li jkollok powerstation li taħdem bil-gass huwa xi ħaġa pożittiva, irid jiġi żgurat li dan il-gass ikun wieħed li ma jagħmilx ħsara lill-ambjent.

Huwa appella biex il-Malta Labour Party jikkjarifika jekk hux se jagħmel użu minn gass magħruf bħala Shale Gas, kif ġie propost minn xi esponenti Laburisti. Dan it-tip ta' gass, qalet l-AD, hu fost l-aktar materjali li jagħmlu ħsara lill-ambjent. Iċ-Chairperson tal-AD stieden lil Muscat u lill-Malta Labour Party biex jippubblikaw l-istudji kollha li qed jgħidu li saru dwar dan il-proġett.

Mistoqsi dwar il-proġetti tal-interconnector u l-pipeline tal-gass, Michael Briguglio esprima l-approvazzjoni tiegħu għal dak li qed jagħmel il-Gvern prezenti u sejjaħ għal aktar investiment f'enerġija nadifa.

Minkejja dan, l-ikbar tħassib tal-AD jibqa' dwar kif se jorħsu l-kontijiet. Dan it-tħassib esprimieh ukoll uffiċjal ieħor tal-Alternattiva, is-Segretarju Internazzjonali Arnold Cassola, meta din il-ġimgħa kien mistieden fuq Bondi+, fuq l-istazzjon nazzjonali.

L-AD, fi stqarrija li ħarġet, tenniet li aspetti varji tal-pjan tal-Lejber jistgħu jkunu problematiċi, u l-pjan hu ambizzjuż u ottimist iżżejjed dwar il-prezz tal-gass u dwar it-timeframes stipulati.