''Il-PN jifhem lis-soċjetà Maltija u se jagħti 'l-poplu l-aħjar possibbli'' - Lawrence Gonzi

Fil-Kunsill Ġenerali tal-lejla, il-Partit Nazzjonalista se jkun qed japprova l-manifest elettorali tiegħu ibbażat fuq l-iktar prinċipji importanti għas-snin li ġejjin, li minnu se jkunu qed joħorġu l-valuri tax-xogħol, tas-saħħa u tal-edukazzjoni. Il-Partit Nazzjonalista jifhem x'għandna fis-soċjetà Maltija u allura se jkun qed jagħti 'l-poplu l-aħjar possibbli. Imbagħad, aktar 'il quddiem, jitnieda l-programm elettorali.

Hekk sostna l-Prim Ministru u l-Kap tal-Partit Nazzjonalista Lawrence Gonzi dalgħodu f'Villa Arrigo waqt l-attività 'Qalb il-Familja'. Preżenti kien hemm il-Viċi Kap tal-Partit Nazzjonalista Simon Busuttil, li semma kif il-manifest elettorali li se jiġi ppreżentat fil-kunsill ġenerali tal-lejla hu mibni fuq l-ingredjenti tajbin għall-kwalità ta' ħajja tajba. Dan għaliex il-Partit Nazzjonalista qed jikkometti ruħu għal futur fis-sod mibni fuq ix-xogħol, is-saħħa u l-edukazzjoni, it-tliet affarijiet kruċjali.

Preżenti għal din il-laqgħa bit-tema tal-well being, kien hemm ukoll Adele Muscat, psikologa fil-qasam tal-isport li rrikonoxxiet il-ħidma tal-Kunsill Malti għall-isport u d-dipartiment għall-promozzjoni tas-saħħa li joħolqu bosta attivitajiet sportivi fil-komunità u elenkat ukoll il-benefiċċji tal-outdoor gyms. Il-psikologa li bbenfiikat minn scholarships sabiex tiżviluppa aktar fis-settur tagħha, elenkat il-benefiċċji tas-sħubija ta' Malta fl-Unjoni Ewropea fosthom fil-qasam tal-edukazzjoni.

Tkellmet ukoll il-Kandidata għall-elezzjoni generali Claudette Buttigieg li semmiet kif il-gvern izomm id il-familja mill-bidu nett u li 'futur fis-sod' mhix slogan, iżda wiegħda. Kandidata oħra li tkellmet kienet Marthese Portelli, li min-naħa tagħha elenkat il-miżuri li ħa l-Gvern Nazzjonalsita b'risq il-bilanċ fejn il-familja u x-xogħol fosthom iċ-child care centres.