"Naħdmu biex isir il-proġett tat-tunnel lejn Għawdex" - Il-Prim Ministru Lawrence Gonzi

Il-Gvern irid jiggarantixxi futur fis-sod anke f'Għawdex. U għalhekk, waħda mill-proposti tal-PN għall-ħames snin li ġejjin hija marbuta mal-aċċessibilta' lejn il-gżira Għawdxija.

 

Waqt żjara li għamel f'Għawdex is-Sibt filgħodu, il-Prim Ministru saħaq illi biex tiżdied l-aċċessibilta' lejn Għawdex hemm bżonn ta' link permanenti u għalhekk determinati li jwettaq il-proġett tat-tunnel. 

F'Għawdex il-Prim Ministru għamel numru ta' żjarat lil tal-ħwienet fil-Belt Victoria, kif ukoll fi stabbilimenti kummerċjali.

F'kummenti lill-ġurnalisti, Lawrence Gonzi qal li il-Gvern jinsab kommess li jkompli jinvesti f'Għawdex, li jissaħħaħ il-kunċett ta' Kunsill Reġjonali, li jiddaħħlu aktar inċentivi fiskali għall-impriżi Għawdxin, u jkun hemm għajnuna lin-negozjanti żgħar biex ikollhom aktar spazji fejn jaħdmu.

Il-Prim Ministru fakkar li l-gżira Għawdxija dejjem kienet fil-qalba tal-politika tal-PN. U l-investiment li sar fl-aħħar snin, diġa' qed iġib ir-riżultati.

Meta tkellem mas-sidien tal-ħwienet fir-Rabat Għawdex il-Prim Ministru reġa' tenna d-determinazzjoni tal-Gvern preżenti li jinħoloq xogħol f'Għawdex għall-Għawdxin.